Indian Embassy advisory; സൗദി അറേബ്യയിൽ ഹൂതി വിമതരുടെ വ്യോമാക്രമണ ഭീഷണി രൂക്ഷമായ സാഹചര്യത്തിൽ രാജ്യത്തെ ഇന്ത്യൻ പൗരന്മാർക്ക് പുതിയ സുരക്ഷാ ജാഗ്രതാനിർദേശവുമായി റിയാദിലെ ഇന്ത്യൻ എംബസി. ജനവാസ മേഖലകളെയും അടിസ്ഥാന സൗകര്യങ്ങളെയും ലക്ഷ്യമിട്ടുള്ള അപ്രതീക്ഷിത ആക്രമണങ്ങൾ ഉണ്ടായാൽ ജനങ്ങൾ പുറത്തിറങ്ങാതെ വീടുകളിലും സുരക്ഷിത സ്ഥാനങ്ങളിലും തന്നെ തുടരണമെന്ന് എംബസി കർശന നിർദേശം നൽകി. പ്രാദേശിക സിവിൽ ഡിഫൻസും ഭരണകൂടവും പുറപ്പെടുവിക്കുന്ന സുരക്ഷാ മാർഗനിർദേശങ്ങൾ പൂർണമായും പാലിക്കണം. ആക്രമണങ്ങളുമായി ബന്ധപ്പെട്ട ദൃശ്യങ്ങളോ സ്ഥിരീകരിക്കാത്ത വാർത്തകളോ സമൂഹമാധ്യമങ്ങൾ വഴി പ്രചരിപ്പിക്കരുതെന്നും അത് നിയമവിരുദ്ധമാണെന്നും അധികൃതർ മുന്നറിയിപ്പ് നൽകി. അത്യാവശ്യ കാര്യങ്ങൾക്കല്ലാതെ ദീർഘദൂര യാത്രകൾ ഒഴിവാക്കാനും നിർദേശമുണ്ട്. കഴിഞ്ഞ ഒക്ടോബർ 10-ന് റിയാദിലെ കിങ് ഖാലിദ് അന്താരാഷ്ട്ര വിമാനത്താവളത്തിനു നേരെയുണ്ടായ ആക്രമണത്തിൽ ഒരു ഇന്ത്യൻ പൗരൻ കൊല്ലപ്പെടുകയും 11 ഇന്ത്യക്കാർക്ക് പരിക്കേൽക്കുകയും ചെയ്തിരുന്നു. പരിക്കേറ്റവരിൽ രണ്ട് ഇന്ത്യക്കാർ ഇപ്പോഴും അപകടനില തരണം ചെയ്യാതെ തീവ്രപരിചരണ വിഭാഗത്തിൽ (ഐസിയു) തുടരുകയാണ്. ആരോഗ്യനില മെച്ചപ്പെട്ട ഒരാളെ ഐസിയുവിൽനിന്ന് ഹൈ ഡിപ്പൻഡൻസി യൂണിറ്റിലേക്ക് (HDU) മാറ്റിയിട്ടുണ്ട്. മറ്റ് നാല് ഇന്ത്യക്കാർ ആശുപത്രികളിൽ ചികിത്സയിൽ കഴിയുമ്പോൾ, പരിക്കുകൾ ഭേദമായ ഒരാൾ ആശുപത്രി വിട്ടു. ഇവർക്ക് സാധ്യമായ മികച്ച ചികിത്സ ഉറപ്പാക്കാൻ എംബസി ഉദ്യോഗസ്ഥർ ആശുപത്രി അധികൃതരുമായി നിരന്തരം സമ്പർക്കം പുലർത്തുന്നുണ്ട്.

സുരക്ഷ മുൻനിർത്തി റിയാദ് അന്താരാഷ്ട്ര വിമാനത്താവളത്തിലെ പ്രവർത്തനങ്ങൾ പൂർണമായും നിർത്തിവെച്ചിരിക്കുകയാണ്. ജിദ്ദ, ദമാം, മദീന വിമാനത്താവളങ്ങളിലെ സർവീസുകളെയും നിലവിലെ പ്രതിസന്ധി കാര്യമായി ബാധിച്ചു. വ്യോമപാതയിലെ സുരക്ഷാ ആശങ്കകൾ കാരണം എയർ ഇന്ത്യ, എയർ ഇന്ത്യ എക്സ്പ്രസ്, ഇൻഡിഗോ, ആകാശ എയർ എന്നീ ഇന്ത്യൻ വിമാനക്കമ്പനികൾ ഒക്ടോബർ 17 വരെയുള്ള സർവീസുകൾ റദ്ദാക്കി. ഇത് നാട്ടിലേക്ക് പോകാനിരുന്ന നൂറുകണക്കിന് പ്രവാസികളെ യാത്രാദുരിതത്തിലാഴ്ത്തി. എന്നാൽ സൗദിയ എയർലൈൻസും ഫ്ലൈനാസും തെരഞ്ഞെടുത്ത റൂട്ടുകളിൽ സർവീസുകൾ തുടരുന്നുണ്ട്. വിമാനത്താവളങ്ങളിൽ കുടുങ്ങിയ യാത്രക്കാരെ സഹായിക്കാനും അടിയന്തര സഹായങ്ങൾക്കുമായി 24 മണിക്കൂറും പ്രവർത്തിക്കുന്ന പ്രത്യേക കൺട്രോൾ റൂമും എംബസി സജ്ജമാക്കിയിട്ടുണ്ട്.