UAE flight status; പശ്ചിമേഷ്യൻ മേഖലയിലെ സുരക്ഷാ ആശങ്കകളെ തുടർന്ന് യുഎഇയിലെ വിമാന സർവീസുകൾ വ്യാപകമായി തടസ്സപ്പെട്ടു. നിരവധി വിമാനങ്ങൾ റദ്ദാക്കുകയും പലതും വൈകുകയും ചെയ്തതോടെ ആയിരക്കണക്കിന് യാത്രക്കാരാണ് ദുരിതത്തിലായത്. യുഎഇക്കും സൗദി അറേബ്യയ്ക്കും ഇടയിലുള്ള സർവീസുകളെയാണ് പ്രതിസന്ധി ഏറ്റവും കൂടുതൽ ബാധിച്ചത്. ഇതുകൂടാതെ അബുദാബി, ഷാർജ വിമാനത്താവളങ്ങളിൽ നിന്ന് ഏഷ്യ, മിഡിൽ ഈസ്റ്റ്, യൂറോപ്പ് എന്നിവിടങ്ങളിലേക്കുള്ള നിരവധി സർവീസുകളും റദ്ദാക്കി. വിമാനത്താവളത്തിലേക്ക് തിരിക്കുന്നതിന് മുൻപായി സർവീസുകളുടെ തത്സമയ വിവരങ്ങൾ എയർലൈനുകളുമായി നേരിട്ട് ബന്ധപ്പെട്ട് യാത്രക്കാർ ഉറപ്പുവരുത്തണമെന്ന് അധികൃതർ നിർദേശിച്ചു.

സുരക്ഷാ ഭീഷണികളെ തുടർന്ന് സൗദി അറേബ്യയിലേക്കുള്ള വിമാന സർവീസുകൾ പ്രതിസന്ധിയിലാണ്. റിയാദിലെ കിങ് ഖാലിദ് അന്താരാഷ്ട്ര വിമാനത്താവളത്തിന്റെ പ്രവർത്തനം താൽക്കാലികമായി നിർത്തിവെച്ചിരിക്കുകയാണ്. ദമ്മാം, ജിദ്ദ, മദീന വിമാനത്താവളങ്ങൾ പ്രവർത്തിക്കുന്നുണ്ടെങ്കിലും പല സർവീസുകളും തടസ്സപ്പെടുന്നുണ്ട്. യുഎഇയിലേക്ക് ഇറാനിയൻ വിമാനക്കമ്പനികൾ സർവീസ് നടത്തുന്നതിനുള്ള വിലക്ക് തുടരുകയാണ്. ഇറാൻ എയർടൂറിന് ദുബായിലേക്ക് സർവീസ് നടത്താൻ അനുമതിയില്ല. സെപ്റ്റംബർ 30-ലെ സുരക്ഷാ സംഭവത്തിന് പിന്നാലെ ദുബായ്-ടെൽ അവീവ് വിമാന സർവീസുകളും സാധാരണ നിലയിലായിട്ടില്ല. എമിറേറ്റ്സ് ഫ്ലൈദുബായിയുമായുള്ള കോഡ്ഷെയർ സർവീസുകൾ നിർത്തിവെച്ചിരിക്കുകയാണ്.

അബുദാബിയിൽ കാഠ്മണ്ഡു, മാഞ്ചസ്റ്റർ, മലാഗ എന്നിവിടങ്ങളിൽ നിന്നുള്ള വിമാനങ്ങൾ വൈകിയാണ് എത്തിയത്.
എത്തിഹാദ് എയർവേസ്: സുരക്ഷാ സാഹചര്യങ്ങൾ മുൻനിർത്തി അബുദാബിയിൽ നിന്ന് ദമ്മാം, റിയാദ്, ജിദ്ദ എന്നിവിടങ്ങളിലേക്കുള്ള എല്ലാ വിമാനങ്ങളും ഒക്ടോബർ 24 വരെ റദ്ദാക്കി.

ദുബായ് വിമാനത്താവളം

• ഇന്ത്യയിൽ നിന്നും സൗദിയിൽ നിന്നുമുള്ള നിരവധി വിമാനങ്ങളാണ് ദുബായ് വിമാനത്താവളത്തിൽ റദ്ദാക്കിയത്.
• മുംബൈയിൽ നിന്നുള്ള സ്പൈസ് ജെറ്റ് (SG 5060) റദ്ദാക്കി.
• ഗസീമിൽ നിന്നുള്ള ഫ്ലൈഅദീൽ (F3 1505), റിയാദിൽ നിന്നുള്ള ഫ്ലൈനാസ് (XY 205, XY 207, XY 217) സർവീസുകൾ റദ്ദാക്കി.

എമിറേറ്റ്സിന്റെയും ഫ്ലൈദുബായിയുടെയും സൗദി സർവീസുകളിൽ ചിലത് ഷെഡ്യൂൾ പ്രകാരം നടക്കുന്നുണ്ടെങ്കിലും പല റൂട്ടുകളിലെയും വിവരങ്ങൾ അനിശ്ചിതത്വത്തിലാണ്.

എയർ അറേബ്യ സർവീസുകൾ റദ്ദാക്കി

അബുദാബി, ഷാർജ എന്നിവിടങ്ങളിൽ നിന്നുള്ള നിരവധി എയർ അറേബ്യ വിമാനങ്ങൾ റദ്ദാക്കി:

• അബുദാബിയിൽ നിന്ന്: യെരവാൻ, ധാക്ക, കുവൈത്ത്, ഫൈസലാബാദ്, മുൽത്താൻ, സിയാൽകോട്ട് സർവീസുകൾ റദ്ദാക്കി.
• ഷാർജയിൽ നിന്ന്: യെരവാൻ, ബഹ്റൈൻ, ചിറ്റഗോങ്, ധാക്ക, സൊഹാഗ്, കുവൈത്ത്, ബിഷ്കെക്, മാലി, ഇസ്ലാമാബാദ്, കറാച്ചി, എന്റബെ, ലണ്ടൻ ഗാറ്റ്വിക് എന്നിവിടങ്ങളിലേക്കുള്ള സർവീസുകളാണ് റദ്ദാക്കിയത്.

യാത്രാ മുന്നറിയിപ്പുകൾ

യുഎസ്, യുകെ, ഓസ്‌ട്രേലിയ തുടങ്ങിയ രാജ്യങ്ങൾ സൗദി അറേബ്യയിലേക്ക് യാത്രാ മുന്നറിയിപ്പ് പുറപ്പെടുവിച്ചിട്ടുണ്ട്. റിയാദ് വിമാനത്താവളത്തിലേക്കുള്ള യാത്ര ഒഴിവാക്കണമെന്നാണ് മുന്നറിയിപ്പ്.

• ഇന്ത്യൻ വിമാനക്കമ്പനികൾ: എയർ ഇന്ത്യ, എയർ ഇന്ത്യ എക്സ്പ്രസ്, ഇൻഡിഗോ എന്നിവ ഒക്ടോബർ 24 വരെയും ആകാശ എയർ ഒക്ടോബർ 27 വരെയും സൗദി അറേബ്യയിലേക്കുള്ള സർവീസുകൾ നിർത്തിവെച്ചു.

അന്താരാഷ്ട്ര എയർലൈൻ വിവരങ്ങൾ

• ലുഫ്താൻസ ഒക്ടോബർ 25 മുതലും, സ്വിസ് ഒക്ടോബർ 27 മുതലും ദുബായ് സർവീസുകൾ പുനരാരംഭിക്കും.
• എയർ ഫ്രാൻസ് ഒക്ടോബർ 24 വരെ ദുബായ്, റിയാദ് സർവീസുകൾ നിർത്തിവെച്ചു.
• സിംഗപ്പൂർ എയർലൈൻസ് ഡിസംബർ 1 വരെയും, കാഥെ പസഫിക് 2027 ജനുവരി 31 വരെയും സർവീസുകൾ നിർത്തിവെച്ചു.
• ബ്രിട്ടീഷ് എയർവേസ് നവംബർ 3-ന് ദുബായ് സർവീസ് പുനരാരംഭിക്കും.

യാത്രക്കാർ ശ്രദ്ധിക്കേണ്ട കാര്യങ്ങൾ

• വിമാനത്താവളത്തിലേക്ക് പുറപ്പെടുന്നതിന് മുൻപ് നിങ്ങളുടെ വിമാനത്തിന്റെ ഏറ്റവും പുതിയ വിവരങ്ങൾ എയർലൈനുമായി ബന്ധപ്പെട്ട് ഉറപ്പുവരുത്തുക.
• ചെക്ക്-ഇൻ നടപടികൾ പൂർത്തിയാക്കാൻ പതിവിലും നേരത്തെ വിമാനത്താവളത്തിൽ എത്തുക.
• എയർലൈനുകൾ നൽകുന്ന വിവരങ്ങൾ ലഭിക്കുന്നതിനായി ബുക്കിംഗിലെ ഫോൺ നമ്പറും ഇമെയിലും കൃത്യമാണെന്ന് ഉറപ്പാക്കുക.
• വിമാനം റദ്ദാക്കുകയാണെങ്കിൽ ടിക്കറ്റ് തുക മടക്കി ലഭിക്കുന്നതിനോ (Refund) മറ്റൊരു ദിവസത്തേക്ക് മാറ്റുന്നതിനോ എയർലൈനുമായോ ട്രാവൽ ഏജന്റുമായോ ബന്ധപ്പെടുക.