Riyadh airport attack; സൗദി അറേബ്യയിലെ റിയാദ് കിങ് ഖാലിദ് അന്താരാഷ്ട്ര വിമാനത്താവളത്തിൽ ഹൂതി വിമതർ നടത്തിയ മിസൈലാക്രമണത്തിന്റെ ഭീതിജനകമായ സിസിടിവി ദൃശ്യങ്ങൾ പുറത്തുവന്നു. ഉംറ തീർഥാടകർ ഉൾപ്പെടെ നിരവധി യാത്രക്കാർ ടെർമിനലിൽ വിമാനത്തിൽ കയറാൻ കാത്തുനിൽക്കുന്നതിനിടെ പെട്ടെന്ന് തീയും പുകയും പടരുന്നതും, പ്രകമ്പനത്തോടെ മേൽക്കൂര തകർന്നുവീഴുമ്പോൾ ആളുകൾ ജീവനുംകൊണ്ട് ചിതറിയോടുന്നതും ദൃശ്യങ്ങളിൽ വ്യക്തമാണ്. വിമാനത്താവളത്തിന്റെ വിവിധ ഭാഗങ്ങളിൽ നിന്നുള്ള സിസിടിവി ദൃശ്യങ്ങൾ സംയോജിപ്പിച്ച വീഡിയോയാണ് ഇപ്പോൾ മാധ്യമങ്ങളിലൂടെ പ്രചരിക്കുന്നത്. യാത്രക്കാർ ടെർമിനലിൽ വിശ്രമിക്കുന്നതിനിടെ പെട്ടെന്ന് ഓറഞ്ച് നിറത്തിലുള്ള വൻ അഗ്നിഗോളവും സ്ഫോടനവും ദൃശ്യമാകുന്നതോടെയാണ് പരിഭ്രാന്തി ആരംഭിക്കുന്നത്. കഴിഞ്ഞ ദിവസങ്ങളിൽ വിമാനത്താവളത്തിന് നേരെയുണ്ടായ തുടർച്ചയായ ആക്രമണങ്ങളിൽ ഒരു ഇന്ത്യക്കാരൻ ഉൾപ്പെടെ 14 പേർ കൊല്ലപ്പെടുകയും മുന്നൂറിലധികം ആളുകൾക്ക് പരിക്കേൽക്കുകയും ചെയ്തിരുന്നു. കുടുംബത്തോടൊപ്പം ഉംറ നിർവഹിക്കാൻ പോകാനായി വിമാനത്താവളത്തിൽ കാത്തിരുന്ന ഹൈദരാബാദ് സ്വദേശിയായ മുഹമ്മദ് യൂസഫാണ് ആക്രമണത്തിൽ മരിച്ച ഇന്ത്യൻ പൗരൻ. ആക്രമണത്തിന്റെ ആഘാതത്തിൽ ടെർമിനലിന്റെ മേൽക്കൂര തകർന്നുവീണാണ് ഇദ്ദേഹത്തിന് ഗുരുതരമായി പരിക്കേറ്റതും തുടർന്ന് ജീവൻ നഷ്ടമായതും.

റിയാദ് വിമാനത്താവളത്തിന് പുറമെ കിഴക്കൻ മേഖലയിലെ ദമാം വിമാനത്താവളത്തെയും സൗദി അരാംകോയുടെ തന്ത്രപ്രധാന കേന്ദ്രങ്ങളെയും ലക്ഷ്യമിട്ട് ഹൂതികൾ ഡ്രോൺ, മിസൈൽ ആക്രമണങ്ങൾ നടത്തിയിട്ടുണ്ട്. ഇറാൻ പിന്തുണയുള്ള ഹൂതി വിമതർ ആക്രമണങ്ങളുടെ പൂർണ്ണ ഉത്തരവാദിത്തം ഏറ്റെടുത്തതിനൊപ്പം സൗദിയിലെ വിമാനത്താവളങ്ങൾ ഇനിയും തങ്ങളുടെ ലക്ഷ്യമായിരിക്കുമെന്ന മുന്നറിയിപ്പും നൽകിയിട്ടുണ്ട്.
ആക്രമണങ്ങളുടെ പശ്ചാത്തലത്തിൽ റിയാദിലേക്കും തിരിച്ചുമുള്ള വിമാന സർവീസുകൾ താത്കാലികമായി നിർത്തിവെക്കുകയോ നിയന്ത്രിക്കുകയോ ചെയ്തത് സൗദിയിലെ പ്രവാസികളെയും തീർഥാടകരെയും വലിയ അനിശ്ചിതത്വത്തിലാക്കിയിരിക്കുകയാണ്. പൗരന്മാർ അതീവ ജാഗ്രത പാലിക്കണമെന്ന് ഇന്ത്യൻ എംബസി മുന്നറിയിപ്പ് നൽകിയിട്ടുണ്ട്. സിവിലിയൻ കേന്ദ്രങ്ങൾക്ക് നേരെയുള്ള ആക്രമണങ്ങളെ ഇന്ത്യ ശക്തമായി അപലപിച്ചു. അതേസമയം, യെമനിലെ ഹൂതി കേന്ദ്രങ്ങൾക്ക് നേരെ സഖ്യസേന പ്രത്യാക്രമണം ശക്തമാക്കിയതോടെ ഗൾഫ് മേഖല വീണ്ടും വലിയ യുദ്ധഭീതിയിലാണ്.