artificial intelligence vaccine; എ.ഐ സാങ്കേതികവിദ്യ പൂർണ്ണമായി രൂപകൽപ്പന ചെയ്ത ലോകത്തിലെ ആദ്യത്തെ വാക്സിൻ മനുഷ്യരിൽ വിജയകരമായി പരീക്ഷിച്ചു. യുകെയിലെ കേംബ്രിഡ്ജ് സർവകലാശാലയിലെ ഗവേഷകരാണ് ഈ ചരിത്രപരമായ നേട്ടത്തിന് പിന്നിൽ. ഭാവിയിൽ ഉണ്ടായേക്കാവുന്ന വലിയ മഹാമാരികളെയും (Pandemics) വിവിധ തരം വൈറസ് വകഭേദങ്ങളെയും മുൻകൂട്ടി തടയാൻ ശേഷിയുള്ള ഒരു ‘സൂപ്പർ വാക്സിൻ’ ആണ് ശാസ്ത്രജ്ഞർ വികസിപ്പിച്ചെടുത്തിരിക്കുന്നത്. മാറിക്കൊണ്ടിരിക്കുന്ന കൊവിഡ് വകഭേദങ്ങൾ ഉൾപ്പെടെയുള്ള എല്ലാത്തരം കൊറോണ വൈറസുകൾക്കെതിരെയും ഈ വാക്സിൻ ഫലപ്രദമാണെന്ന് ഗവേഷകർ അവകാശപ്പെടുന്നു. നിലവിൽ മൃഗങ്ങളെ മാത്രം ബാധിക്കുന്നതും എന്നാൽ ഭാവിയിൽ മനുഷ്യരിലേക്ക് പടർന്ന് പുതിയ മഹാമാരികൾക്ക് കാരണമായേക്കാവുന്നതുമായ വൈറസുകളെ വരെ പ്രതിരോധിക്കാൻ ഇതിന് സാധിക്കും.
എന്താണ് ഈ എ.ഐ വാക്സിന്റെ പ്രത്യേകത?
സാധാരണയായി നിലവിലുള്ള ഒരു വൈറസിന്റെ ഘടനയെ അടിസ്ഥാനമാക്കിയാണ് വാക്സിനുകൾ നിർമ്മിക്കുന്നത്. എന്നാൽ വൈറസുകൾ തുടർച്ചയായി ജനിതക വ്യതിയാനം (Mutation) വരുത്തുന്നതിനാൽ ഇത്തരം വാക്സിനുകളുടെ ഫലപ്രാപ്തി പെട്ടെന്ന് നഷ്ടപ്പെടാറുണ്ട്. അതുകൊണ്ടാണ് കോവിഡ്, ഫ്ലൂ വാക്സിനുകൾ കൃത്യമായ ഇടവേളകളിൽ പുതുക്കേണ്ടി വരുന്നത്. എന്നാൽ കേംബ്രിഡ്ജിലെ ഗവേഷകർ വ്യത്യസ്തമായ ഒരു രീതിയാണ് സ്വീകരിച്ചത്. ലോകത്തിന്റെ വിവിധ ഭാഗങ്ങളിൽ കണ്ടെത്തിയ പലതരം കൊറോണ വൈറസുകളുടെ ജനിതക ഘടനകൾ (Genetic codes) അവർ ശേഖരിച്ചു. ഈ വിവരങ്ങൾ ആർട്ടിഫിഷ്യൽ ഇന്റലിജൻസ് ഉപയോഗിച്ച് വിശകലനം ചെയ്തു. തുടർന്ന്, വൈറസ് എത്ര രൂപമാറ്റം സംഭവിച്ചാലും അതിനെയെല്ലാം ചെറുക്കാൻ ശേഷിയുള്ള ഒരു ‘സൂപ്പർ ആന്റിജൻ’ (Super-antigen) എ.ഐ നിർമ്മിച്ചെടുത്തു. വാക്സിനുകളിലെ ഏറ്റവും പ്രധാനപ്പെട്ട ഘടകമാണ് ആന്റിജൻ. ഇത് ഉപയോഗിച്ചാണ് നമ്മുടെ രോഗപ്രതിരോധ വ്യവസ്ഥ വൈറസിനെ തിരിച്ചറിയാനും നശിപ്പിക്കാനും പഠിക്കുന്നത്.
വാക്സിൻ സുരക്ഷിതമാണോ എന്ന് പരിശോധിക്കാൻ 39 പേരിൽ നടത്തിയ ആദ്യഘട്ട പരീക്ഷണം വിജയകരമായിരുന്നു. പ്രതിരോധ സംവിധാനത്തിൽ ഈ വാക്സിൻ ഉണ്ടാക്കുന്ന മാറ്റങ്ങൾ കൂടുതൽ കൃത്യമായി മനസ്സിലാക്കാൻ ഇരുന്നൂറോളം പേരെ ഉൾപ്പെടുത്തിക്കൊണ്ടുള്ള രണ്ടാമത്തെ പഠനം ഇപ്പോൾ പുരോഗമിക്കുകയാണ്. ഇത് ഇന്നത്തെ വൈറസുകളിൽ നിന്ന് മാത്രമല്ല, ഭാവിയിൽ ഉണ്ടായേക്കാവുന്ന മഹാമാരികളിൽ നിന്ന് കൂടി നമ്മെ സംരക്ഷിക്കുന്ന വാക്സിനുകൾ നിർമ്മിക്കുന്നതിനുള്ള തുടക്കമാണ്. മഹാമാരികളെ നേരിടുന്നതിൽ ഇതൊരു വലിയ മാറ്റത്തിന് വഴിതുറക്കും. — പ്രൊഫ. ജോനാഥൻ ഹീനി (കേംബ്രിഡ്ജ് സർവകലാശാല)
എബോളയ്ക്കും പനിക്കും എതിരെ പുതിയ വാക്സിനുകൾ
ഈ എ.ഐ സാങ്കേതികവിദ്യ ഉപയോഗിച്ച് എല്ലാ വർഷവും മാറ്റേണ്ടതില്ലാത്ത ‘യൂണിവേഴ്സൽ ഇൻഫ്ലുവൻസ’ (Universal Flu) വാക്സിനും പക്ഷപ്പനിക്കെതിരെയുള്ള (H5N1) വാക്സിനും വികസിപ്പിക്കാനുള്ള മൃഗങ്ങളിലെ പരീക്ഷണങ്ങൾ ഗവേഷകർ ആരംഭിച്ചുകഴിഞ്ഞു. കൂടാതെ, നിലവിൽ കൃത്യമായ വാക്സിനുകളില്ലാത്തതും ആഫ്രിക്കൻ രാജ്യങ്ങളിൽ പടർന്നുപിടിക്കുന്നതുമായ മാരകമായ ‘എബോള’ (Ebola) വൈറസിനെ ചെറുക്കാനുള്ള വാക്സിൻ നിർമ്മാണവും ഈ രീതിയിലൂടെ പുരോഗമിക്കുകയാണ്. വാക്സിൻ ഗവേഷണ രംഗത്ത് എ.ഐ സാങ്കേതികവിദ്യ ഒരു വൻ മാറ്റം (Game changer) കൊണ്ടുവരുമെന്നും, ഭാവിയിൽ വാക്സിനുകൾ അതിവേഗം വികസിപ്പിച്ച് ലക്ഷക്കണക്കിന് മനുഷ്യജീവനുകൾ രക്ഷിക്കാൻ ഇത് സഹായിക്കുമെന്നും ശാസ്ത്രലോകം വിലയിരുത്തുന്നു.
