Ozone Hole; ഭൂമിയുടെ സംരക്ഷണ കവചമായ ഓസോൺ പാളിയിൽ നിന്നൊരു ശുഭവാർത്ത. അന്റാർട്ടിക്കയ്ക്ക് മുകളിലെ ഓസോൺ പാളിയിലുണ്ടായ വിള്ളൽ (Ozone Hole) കഴിഞ്ഞ മൂന്ന് പതിറ്റാണ്ടിനിടയിലെ ഏറ്റവും കുറഞ്ഞ വലുപ്പത്തിലെത്തിയതായി നാസയിലെയും (NASA) നാഷണൽ ഓഷ്യാനിക് ആൻഡ് അറ്റ്‌മോസ്ഫെറിക് അഡ്മിനിസ്‌ട്രേഷനിലെയും (NOAA) ശാസ്ത്രജ്ഞർ അറിയിച്ചു. ഹാനികരമായ രാസവസ്തുക്കൾ നിയന്ത്രിക്കാനുള്ള ആഗോള ശ്രമങ്ങളുടെ വിജയമായാണ് ഇതിനെ വിലയിരുത്തുന്നത്. പുതിയ റിപ്പോർട്ടുകൾ പ്രകാരം, 1992-ന് ശേഷമുള്ള ഏറ്റവും ചെറിയ അഞ്ചാമത്തെ ഓസോൺ ദ്വാരമാണ് ഈ വർഷത്തേത്. 2025 സെപ്റ്റംബർ 7 മുതൽ ഒക്ടോബർ 13 വരെയുള്ള കണക്കനുസരിച്ച്, വിള്ളലിന്റെ ശരാശരി വിസ്തീർണ്ണം 7.23 ദശലക്ഷം ചതുരശ്ര മൈലായി കുറഞ്ഞു. 2006-ൽ രേഖപ്പെടുത്തിയ ഏറ്റവും വലിയ വിള്ളലിനേക്കാൾ 30 ശതമാനം കുറവാണിത്. മാത്രമല്ല, മുൻവർഷങ്ങളെ അപേക്ഷിച്ച് മൂന്ന് ആഴ്ചകൾക്ക് മുൻപേ തന്നെ ഈ വിള്ളൽ അടഞ്ഞുതുടങ്ങിയതായും ശാസ്ത്രജ്ഞർ നിരീക്ഷിച്ചു.

മോൺട്രിയൽ പ്രോട്ടോക്കോളിൻ്റെ വിജയം

ഓസോൺ പാളിയെ നശിപ്പിക്കുന്ന ക്ലോറോ ഫ്ലൂറോ കാർബണുകൾ (CFC) പോലുള്ള വാതകങ്ങൾ നിരോധിച്ചുകൊണ്ടുള്ള ‘മോൺട്രിയൽ പ്രോട്ടോക്കോൾ’ എന്ന അന്താരാഷ്ട്ര കരാറിൻ്റെ ഫലമായാണ് ഈ മാറ്റം ഉണ്ടായത്. 2000-ൽ അന്തരീക്ഷത്തിലുണ്ടായിരുന്ന ക്ലോറിൻ അളവിനേക്കാൾ മൂന്നിലൊന്ന് ഇപ്പോൾ കുറഞ്ഞിട്ടുണ്ട്. ഈ നിയന്ത്രണങ്ങൾ ഉണ്ടായിരുന്നില്ലെങ്കിൽ ഓസോൺ വിള്ളൽ ഇപ്പോഴത്തേക്കാൾ പത്തുലക്ഷം ചതുരശ്ര മൈൽ അധികമാകുമായിരുന്നുവെന്ന് നാസയുടെ മുതിർന്ന ശാസ്ത്രജ്ഞനായ പോൾ ന്യൂമാൻ വ്യക്തമാക്കി.

സൂര്യനിൽ നിന്നുള്ള ഹാനികരമായ അൾട്രാവയലറ്റ് (UV) രശ്മികളെ തടഞ്ഞുനിർത്തുന്ന ആഗോള ‘സൺസ്‌ക്രീൻ’ ആയാണ് ഓസോൺ പാളി പ്രവർത്തിക്കുന്നത്. ഓസോൺ പാളി നശിക്കുന്നത് വഴി ത്വക്ക് കാൻസർ, തിമിരം, കാർഷിക വിളകളുടെ നാശം എന്നിവ വർദ്ധിക്കാൻ സാധ്യതയുണ്ട്. അന്തരീക്ഷ താപനിലയിലുണ്ടായ വർദ്ധനവും അന്റാർട്ടിക്കയ്ക്ക് മുകളിലെ കാറ്റിന്റെ ഗതിയിലുണ്ടായ മാറ്റങ്ങളും ഇത്തവണ വിള്ളൽ കുറയാൻ കാരണമായിട്ടുണ്ട്. എങ്കിലും, അന്തരീക്ഷത്തിൽ അവശേഷിക്കുന്ന പഴയ രാസവസ്തുക്കൾ പൂർണ്ണമായും ഇല്ലാതാകാൻ ഇനിയും സമയമെടുക്കും. നിലവിലെ പുരോഗതി തുടരുകയാണെങ്കിൽ 2060-ഓടെ ഓസോൺ പാളി അതിന്റെ പഴയ അവസ്ഥയിലേക്ക് തിരികെയെത്തുമെന്നാണ് ശാസ്ത്രലോകത്തിന്റെ പ്രതീക്ഷ. ഭൂമിയെ സംരക്ഷിക്കാൻ ലോകരാജ്യങ്ങൾ കൈകോർത്താൽ വലിയ മാറ്റങ്ങൾ സൃഷ്ടിക്കാനാകുമെന്നതിന്റെ തെളിവാണ് ഈ പുതിയ കണ്ടെത്തൽ.